ՀՐԱՏԱՐԱԿՎԵԼ Է «ՀԱՅԿԱԿԱՆ ՈՐՄՆԱՆԿԱՐՉՈՒԹՅՈՒՆ» ԺՈՂՈՎԱԾՈՒՆ
ՀՐԱՏԱՐԱԿՎԵԼ Է «ՀԱՅԿԱԿԱՆ ՈՐՄՆԱՆԿԱՐՉՈՒԹՅՈՒՆ» ԺՈՂՈՎԱԾՈՒՆ
2019 թ. դեկտեմբերին լույս տեսավ «Հայկական որմնանկարչություն» գիտական հոդվածների և նյութերի ժողովածուն, որը կազմել և խմբագրել է պատմական գիտությունների դոկտոր Կարեն Մաթևոսյանը։ Ժողովածուն հրատարակվել է Մատենադարանի գիտական խորհրդի երաշխավորությամբ և «Վիկտորիա» միջազգային բարեգործական հիմնադրամի հովանավորությամբ (հիմնադիր և տնօրեն Գայանե Գեորգյան)։
Հայաստանում հատուկ որմնանկարչության թեմային նվիրված նման ժողովածու առաջին անգամ է հրատարակվում։ Նրա հիմնական նպատակը հայկական որմնանկարչության համակողմանի ուսումնասիրության հետագա խորացումն է։ Գրքում տեղ են գտել վերլուծական հոդվածներ, ինչպես նաև առանձին որմնանկարների վերաբերյալ տեղեկատվական ու փաստագրական նյութեր։
Հրատարակության նպատակներից է ոչ միայն մասնագետների, այլև մշակույթի ու հուշարձանների պահպանության ոլորտի համապատասխան մարմինների և կազմակերպությունների ուշադրության հրավիրումը որմնանկարների խնդրի վրա, քանի որ այս հուշարձանների մեծ մասը գտնվում է վատ վիճակում։
Ժողովածուի բերած նորություններից մեկը կարելի է համարել այն, որ հերքվում է գրականության մեջ տարածված՝ հայկական որմնանկարների փոքրաթիվ լինելու մասին տեսակետը։ Ժողովածուի մեջ բերված հարուստ նյութերը վկայում են, որ միջնադարյան հայկական որմնանկարները փոքրաթիվ չեն, և որ հայկական որմնանկարչությունը զարգացել է հայ ճարտարապետության հիմնական փուլերին համընթաց՝ վաղ միջնադարից մինչև նոր ժամանակներ։
Հայ միջնադարյան որմնանկարչությունն աչքի է ընկնում գեղարվեստական արժանիքներով, հաճախ ինքնատիպ պատկերագրությամբ և կարևոր նշանակությունի ունի ոչ միայն հայ, այլև համաշխարհային արվեստի համար։
Հոդվածներն ունեն ամփոփում անգլերենով։ Գիրքը բաղկացած է 400 էջից, որից 92-ը գունավոր վերատպություններ են։ Գրքի բովանդակությունը՝ հայերեն և անգլերեն, կարելի է տեսնել մեր կայքի ԳՐԱԴԱՐԱՆ բաժնում՝ այստեղ։
Առաջիկա տարվա վերջին գրքի թվային տարբերակը տեղ կգտնի մեր կայքում։
Տեսանյութում ներկայացվում է «Հայկական որմնանկարչություն» ժողովածուի հրատարակության առիթով, կազմող և խմբագիր, պատմական գիտությունների դոկտոր Կարեն Մաթևոսյանի հարցազրույցը «Շողակաթ» հեռուստաընկերությունում (14. 12. 2019)։
Սույն կայքում տեղադրված նյութերը այդ թվում` բոլոր նկարները, պատկերները, տեքստային նյութերը, կարող են օգտագործվել անձնական, կրթական, ինչպես նաև տեղեկատվական նպատակներով, ArmenianArt.org կայքի անվան պարտադիր հղումով։